Suu Kyi-i fapain a nu chhuah turin Mynmar sipaite a ngen

Myanmar civil hruaitu, Aung San Suu Kyi-i fapa naupang zawk, Kim Aris chuan Myanmar sipai sorkar chu a nu chhuah turin a ngen a, a chhuah theihna atana pui turin ram dangte a ngen bawk.

Kum 2021, February 1-a Myanmar sipaite'n Suu Kyi-i kaihhruai civil sorkar paihthla a, thuneihna an hneh chhuh hnuah khan Suu Kyi hi hreng zuiin, tun thlengin a tang a ni. An hren hnuah thubuai hrang hrang siamsak tawhin, a thubuaiahte hian thiam loh chantir a ni a, kum 33 tang turin tih a ni.

British citizen, Aris hian sipaite chuan a nu chanchin, a hriselna dinhmunte engmah an hriattir ngai lo tih sawiin, Burmese embassy, British Foreign Office leh International Red Cross-te pawh a be ṭhin a, anni pawhin an pui thei bik lo tih a sawi.

BBC in an kawmnaah Aris chuan a nu chungchangah media lam a hmachhawn ngai lo tih sawiin, kum 1989-2010 inkara a nu kum 15 dawn pawn chhuak thei loa an hren lai pawh khan a nuin politics lama inrawlh ve lo tura a duh avangin engmah a sawi ngai lo tih a sawi bawk. Tun ṭumah erawh a nu hi kum rei tak tang tura hrem a nih avang leh, sipai lamin a chhan an sawi chian loh vang te, a nu dinhmunte hriattir a nih ngai loh avangin a ṭawng chhuak ve ta tih a sawi bawk.

Civil sorkar paihthlak a nih hnuah Myanmar sipaite hian Suu Kyi-i house arrest-in a dah a, nikum khan an ram khawpui, Nay Pyi Taw-a tan-inah an sawn a ni. Kum hnih chhung chu a chanchin leh dinhmun chiang tak hriat mumal theih a ni tawh lo a, a dam ṭha lo nia report-te a awm a, mahse, sipai lam chuan hei hi an pha thung.