WHO-in khuh damdawi 20 laka fimkhur turin chah

World Health Organisation (WHO) chuan khuh damdawi, cough syrup him tawk lo nia sawi, India leh Indonesia rama siam, damdawi 20-te lakah fimkhur a ngaih thu a sawi. Heng damdawi-te hi khawvel ram hrang hranga mi 300 dawn thihna nen inzawmna neia hriat an ni.

WHO thupuangtu, Christian Lindmeier chuan khuh damdawi 20 an khapte chu India leh Indonesia rama damdawi siamtu 15-te siam a ni, a ti. An damdawi khapte hi syrup vek niin, khuh damdawi, paracetamol leh vitamins-te an ni. An zinga pasarih chu India ram siam niin, Haryana-a Maiden Pharmaceuticals siam pali, Noida-a Marion Biotech siam pahnih leh Punjab-a QP Pharmachem siam pakhat a ni. A dangte chu Indonesia rama siam an ni.

Nikuma Gambia leh Uzbekistan-a naupang 88 dawn thihna thlengah India siam cough syrup chu puh a nih avangin, WHO chuan heng ram pahnihah hian damdawi 15-ah 'medical product alert' a lo tichhuak tawh a ni. Indonesia-ah pawh an ram chhunga damdawi siam chu naupang 200 chuang thihna nen inkaihhnawihna nei nia sawi a nih vangin alert a tichhuak bawk.