Titanic lawng tlawh tumtu Titan sub-a chuangte chin la hre lo

Kum za chuang liam taa Titanic lawng che sual hmuh tuma kal, Titan submersible leh a chhunga chuangte chu an chin hriat a la ni lo niin US Coast Guard chuan an sawi.

Atlantic tuipui mawnga Titanic lawng lian en tur hian U.S.-based company OceanGate Expeditions siam, submersible Titan hi Pathianni zing khan a chhuak a, Titanic awmna thleng tur hian darkar hnih vel ngai tura chhut a nih laiin, tui hnuai an luh aṭanga darkar khat velah biakpawh theih lohin an awm zui a ni. Ni nga zet zawn an nih hnuah, Ningani zing khan robot diving vehicle chuan Titan them hi North Atlantic-a tuifinriat mawngah hmuin, Titan hi a keh ni a ngaih a ni. Titan-ah hian a chuangte mamawh boruak ni li daih awm tura ngaih a ni.

U.S. Coast Guard Rear Admiral John Mauger chuan Titan-a chuang mi pangate pawh thi tawh tura an rin thu a sawi. Submersible chuang zingah hian OceanGate company founder leh chief executive officer Stockton Rush, British billionaire leh explorer Hamish Harding, Pakistani sumdawng Shahzada Dawood leh a fapa Suleman, French oceanographer leh Titanic expert Paul-Henri Nargeolet-te an tel a ni.

Biakpawh theih loha an awm hnu hian US, Canada, France leh Britian search team-te chuan lawng leh thlawhtheihna hmangin tuifinriatah an zawng a, ngawrh taka an zawn hnuah pawh vawiin thlengin hmuh an la ni ta lo a ni.