Russian Wagner fighter-te an hmun lamah kir leh

Russia Wagner private mercenary fighter, Russia laka hela an awmna hmun chhuah sana Russia khawpui lam pante chu inbiakna neihpui an nih hnuah Russia chhim lam, Rostov khuaa an base lamah an kir leh.

Belarus President Alexandre Lukashenko hmalaknaa inbiakna neih hnuah, Wagner group sipaite hi an base lamah kir lehin, an pawl hotu Yevgeny Prigozhin chu Belarus lamah a kal thung.

Nikum February thlaa Russia-in Ukraine a run hnuah, Prigozhin kaihhruai Wagner fighter-te hian Russia sipaite an pui. Prigozhin hi convict tawh a ni a, a sipaite zingah Russia jail hrang hranga tang tawh mi tam tak an tel a, training ṭha tak tak nei an ni.

Ukraine donaa Russia sipaite an puihnaah, Prigozhin chu hun eng emaw chen liam ta aṭang khan sipai hotute lakah a lungawi lo ṭan tawh a, a bikin Defence Minister Sergei Shoigu leh Chief of Generel Staff Valey Gerasimov-te chu a sipaite chu thlawp ṭha lo leh, silai mu an dawn turte pawh dansakah a lo puh tawh ṭhin. Hei vang hian Defence Ministry enkawlna hnuaia a sipaite dahna tur contract siam pawh a sign duh lo a ni.

Kar liam ta Ningani khan Prigozhin chuan Russia sipaite chuan air strike hmanga Wagner fighter-te bei leh, mi eng emaw zat thatah puhin Russia lakah a hel zui a ni. Mahse he puhna hi Defence Ministry chuan a pha thung.

Prigozhin hian Russia sipaite laka a hel hnuah, a sipaite hi Moscow pan turin a hriattir a, Wanger fighter-te hian Rostov-a an base aṭangin Moscow hi an pan a, mahse, inbiakna an neih tak avangin an helna hi titawpin, Prigozhin leh amah zuitu sipaite laka hela puhna thubuai siamsak pawh tihtawp a ni nghal dawn tih Kremlin thupuangtu, Dmitry Peskov chuan a puang nghal bawk. Prigozhin helna zawm ve duh lo, Wagner fighter-te chu Defence Ministry-in contract a siampui bawk ang.