Mecca-ah Muslim-te'n Hajj hmang ; Covid hnua an tam ber ṭum tur

Muslim-te khawpui thianghlim, Saudi Arabia-a Mecca hmuna Kaaba an tihah chuan Muslim-te'n an dam chhunga an tih ngei ngei tur panga zinga pakhat, Hajj hman hun chu nimin atang khan an hmang ṭan.

Kum dang zawng aiin kumin hian khua a lum zual a, hei hi Saudi Arabia-ah pawh an dinhmun a ni a, khaw lum lam hian 45 degree celcius te hial a thleng a ni. Khaw lum hnuaia Hajj hman tur a nih avang hian venhimna leh inenkawlna lama inbuatsaihna pawh an uluk hle. Thuneitute chuan kum 2015-a chhiatna thleng, mi 2,300 chuang thihna thleng ang kha a thlen nawn leh an hlau a ni. Saudi ram thuneitute chuan health worker mi 32,000 chuangin Hajj hmangte hi an vil reng dawn tih an sawi.

Covid-19 hripui leng vanga kum thum chhung mi tam takin Mecca tlawh theih loh tura khuahkhirhna siam chu kumin hian thlahdul a ni tawh a, hei vang hian kumin Hajj-ah hian ram 160 atangin Muslim maktaduai hnih chuang kal khawm tura beisei an ni. Zirtawpni liam ta tlai thleng khan kal khawm tawh zawng zawng an hriat zat hi mi maktaduai khat leh a chanve an tling tawh a, an la thlen belh zel bawk.

Kaaba hi bang kil li neia siam, a duma chei, Mosolman-te'n Hajj an hman laia an hel thin a ni a. Mosolman chuan an dam chhungin he lai hi an tlawh ngei ngei tur a ni tih hi an sakhaw dan a ni.