NKorea khawpuiah anti-US rally huaihawt

North Korea khawpui, Pyongyang-ah Pathianni khan Korean War champha vawi 73-na hun hman a ni a, US-in an ram a rahbehna duh lohna lantira kawngzawh huaihawtin, mi nuai 1.2 chuang an tel.

Pyongyang-a kawng zawhte hian an ram beitu, US nuaibo an duhna thu ziakte leh, US ram laili chu an kah phak reng a ni tih ziahna thuziakte kengin, US an duh lohna thute an aurualpui bawk. State media chuan stadium-a mipui ṭhahnem tak pungkhawm thlalak hi a dah chhuak a ni.

North Korea-in UN resolution palzuta ralthuam a en chhin fo avangin US chuan a vau fo a, hetih lai hian US leh South Korea sipaite'n joint military exercise an neih chu NKorea lam hian ngaimawhin a sawisel fo bawk a, an ram beih tuma an inbuatsaihna niin a puh thung.

Kum 2022 aṭang khan Nkorea hian missile range hrang hrang 100 vel a en chhin tawh nia sawi a ni. An ram hotu lu ber, Kim Jong-Un chuan US ram laili lai leh South Korea-te an kap pha reng tih lantir a tum a ni. Sipaite pawh thuam chakin, July thla khan Pyongyang-ah military parade lian tham tak buatsaih a tum a, he hunah hian an missile hlauhawm tak takte phochhuah a tum nia sawi a ni bawk.

State news agency, KCNA chuan North Korea hian an ram laksak tumtu, US hremna tur ralthuam chak ber a nei tih sawiin, an ram mipuite chu an hmelma laka phuba lak chakin an awm reng a ni, tiin a tarlang.