Japan sipaite'n Starlink satellite hmang dawn

Japan sipai, Self-Defense Force chuan March thla aṭang khan Elon Musk company, SpaceX siam Starlink satellite an lo en chhin tawh a, training-na leh hmun hrang hrang 10 chuanga an en chhin hnuah, kum thara hman theih tura lei ngei an duh thu an sawi.

Japan ministry of defense chuan inbiakpawhna satellite chu geostationary orbit-ah nei mah se, SpaceX siam Starlink hi lei hnaih zawka satellite an hman theih a nih dawn avangin khawvel hlat zawka thlawk satellite-te chhiat hunah min pui thei dawn a ni, an ti.

Starlink technology hi Russia nena indo mek Ukraine pawhin indona hmunah an hmang mek bawk a, Russia erawh chuan an ram huamc hhunga hman khap a tum thung. Ukraine-in a hman mek Starlink technology hi nikum October khan Musk chuan a thlawna hmantir reng tur chuan a sumin a daih bik lo tih a lo sawi tawh a, US Defense department chuan tun thlaa Ukraine-in Stralink an hman man chu peksak a tum thu a sawi.

SpaceX neitu Elon Musk-a Starlink siam hi satellite thlawk hniam (low earth orbit), lei atanga km 550 vela khawvel hel thin satellite tam tak thlunzawmna tur khawl a ni. Hei hi ram tam tak chuan satellite thlawk sang tak takte signal pek chhawn, tihbuai awl tak aiin a ṭangkai zawka an hriat avangin hman dan kawng an zawng mek a ni.