Israel Justice Minister in bulah nawrh huaihawt

Israel sorkarin judicial system siam ṭhat tuma ruahmanna a siam duh lohna kal zelah, nimin zing khan justice minister Yariv Levin chenna in bulah mi eng emaw zat pung khawmin, kawngpuite an dan bakah motor ke an hal bawk.

Prime Minister Benjamin Netanyahu kaihhruai sorkarin judicial system thlak danglam a tumna hi duh loin, mi tam takin hun rei tak chhung lungawi lohna an lantir tawh. Sorkar pawhin a ruahmanna siam hi a sut tawh a, mahse, heti chung hian kar tawp apiangin khawpui hrang hrangah lungawi lohna lantirin an la pung khawm reng a ni.

Nimina Justice Minister in bula pung khawmte hi Brothers in Arms memberte an ni a, dictatorship an duh lo tih ziakna lehkhate kengin, motor kete an hal. Kawngpui an dan avangin traffic pawh hun rei tak chhung a buai phah a ni. Police-te chuan pung khawmte hi an hnawt darh a, an innawr buai a, an zinga pali chu man an ni.

Justice system siam ṭhat tum chungchang hi Thawhṭanni khan Knesset-ah sawiho a ni leh. Hetih lai hian Attorney-General Office chuan he bill hi a dodal tlat tih a sawi.

PM Netanyahu kaihhruai right-wing sorkarin justice system siam ṭhat a tumnaah hian, Israel Superme Court thuneihna tihnepsakna tur a ni tiin, democractic institution hnuaichhiahna leh ṭangrual sorkar laka thuneihna sang tak pek tumna a ni tiin, eptu lam chuan na takin an dodal a ni.