Afghanistan-a Taliban-te'n thuneihna an chan hnua inbeihna thlengah civil mi 1,000 chuang thi tawh

United Nations chuan Afghanistan-a Taliban-te'n thuneihna an chan hnua inbeihna thlengah civil mi 2,000 chuang an thi tawh niin a sawi.

UN mission in Afghanistan, UNAMA chuan Thawhlehni khan report a tichhuak a, Taliban-te'n thuneihna an chan hun, kum 2021 August thla laihawl aṭanga kumin May thla tawp thleng khan civil mi thi hi 3,774 awm tawhin, an zinga mi 1,095 chu inbeihna thlenga thi an ni, an ti.

Afghanistan-a hian US leh NATO sipaite chu kum 20 zet an awm hnua kum 2021 khan a inla chhuak ṭan a, an inlak chhuah fel hma, hemi kum August thla hian Taliban chuan khawthlang ramte thlawp sorkar chu paih thlain, thuneihna an chang zui ta a ni. UN chuan Taliban-te'n thuneihna an chan hnu hian mipui pun khawm tamna, sakhaw hmun, school leh bazarpuiah te bomb a puak fo tih sawiin, thi zinga hmun lia ṭhena hmun thum hi heng bomb tihpuahna hmuna thi an ni, a ti. An zingah hian naupang 287 an tel. Bomb puak zinga a tam zawk hi Sunni group, Khorasan province-a Islamic State-te tihpuah niin, anni hi Taliban nena inhmelma lian ber an ni.