Russia-in Wagner mercenary hotu thubuai a sut

Russia sorkar chuan an ram sipaite laka hel, Wargner private mercenary hotu Yevgeny Prigozhin leh amah zuitu a thurualpuite laka thubuai a siam chu a sut leh.

Federal Security Service, FSB chuan kar liam taa Prigozhin hoa Wagner fighter helte chungchang an chhuinaah, heng fighter helte hian an helna hi an bansan tawh tih hriat a nih thu sawiin, thubuai siamsak an ni zui dawn lo tih a sawi a ni.

President Vladimir Putin chuan Prigozhin leh a fighter-te hi ram phatsantu tiin a lo sawi tawh a, mahse, an helna an tihtawp tak avangin Russia Parliament chuan thubuai siamsak an ni dawn lo tih a sawi a ni. Hela puhna thubuai hi siamsak a, thiam loh chantir an nih chuan kum 20 thleng lung in tantir theih an ni ang.

Russia sorkar laka lungawi lohna lantir zinga mi eng emaw zat chu hun rei tak tang tura hrem an nih laia, thubuai engmah siamsak loa Prigozhin chhuah a ni tur hian sawi zui pawh a hlawh hle.

Hetih lai hian nimin thleng khan Prigozhin hi a la bibo a, Russia sorkar chuan an ṭhenawm, Belarus ramah a tlanchhia nia a lan thu a sawi. Mahse Prigozhin leh Belarus thuneitute chuan engmah an sawi chiang lo thung.

Thawhṭanni zan khan President Putin chuan security, law enforcement leh military official-te meeting a neihpui a, lungrual taka an thawhhona avangin lawmthu a hrilh. Meeting-ah hian Prigozhin-a'n a lo sawisel fo leh ban tura a phut, Defence Minister Sergei Shoigu pawh a tel a ni.