Pakistan Army-in high ranking officer 3 a ban

Pakistan army thupuangtu, Major General Arshad Sharif chuan highest-ranking officer pathum ban an ni tih a puang a, ban zingah hian Lieutenant-General pawh a tel.

May 9-a Pakistan Prime Minister hlui, Imran Khan man a nih avanga a party, Pakistan Tehreek-i-Insaf (PTI) member-te'n an ram khawpui hmun hrang hranga buaina an siam chungchangah, Pakistan Army chuan buaina chhuak thunun zo lo leh, sipai hmun pawimawhte veng him thei loah puhin sipai hotu pathumte hi a ban a, anni bakah Major General pathum leh Brigadier pasarih-te pawh hrem an ni bawk.

Sipai thupuangtu chuan buaina chhuak kaihhnawhah hian mi 102-te chu military court-ah thubuai siamsak an ni tih a sawi. Tharum thawhna thlenga inhnamhnawihte chu na taka hrem an ni ang, a ti.

Sharif chuan PTI mi leh sate'n May 9-a tharum thawhna nasa tak an thlen chu pawi a tiin a dem tak zet tih a sawi a, he ni hi Pakistan tana ni duhawm lo tak a ni reng tawh dawn a ni, tiin a sawi. Hemi nia PTI nen buaina an siamah hian, sorkar building bakah sipai hmun pawimawh eng emaw zat an bei tel a ni.