SKorea-in mihring kum chhiar dan an thlak

South Korea chuan nimin aṭang khan mihring kum chhiar nana traditional method an hman ṭhin chu international standard-in a thlak a, mipuite chu an kum chhinchhiah dan aiin kum khat leh kum hnihte'n an naupang tawh zawk dawn a ni.

An hnam tihdana kum an chhiar danah chuan nau a pian hian kum khat ni nghalin,an pian cham a thlen hunah ni loin, a kum thar January 1-ah kum khat an belh leh nghal ṭhin.

Hei hi sorkar chuan thlakin, nimin aṭang khan kum chhiarna international standard hmang ṭanin, judicial leh administrative area-ah hman nghal vek a ni ang. Traditional method an hman avanga pension leh free travel nei phaa inngai, mahse, an kum dik taka la pha si lote buaina chu international standard an hman hian a tireh thei dawn niin sorkar chuan a sawi.

Minister of Government Legislation Lee Wan-kyu chuan sipaia ṭang thei chin kum leh zu in phal chin kum chhiarna atana age system dang, 'year age' tih an hman erawh chu la hman chhunzawm a ni dawn tih a sawi bawk. Entirna atan, kum 2004-a eng thla pawha piang chu, sipaiah chuan January 1, 2023-ah an lut thei dawn a, sipaia ṭang thei chin kum bitliah, kum 19 tling anga ngaih an ni ang. Kum chhiarna atana international standard an hmanin a nghawng dan azirin, 'year age' system pawh ennawn leh a la ni maithei niin Lee chuan a sawi bawk.

South Korea Parliament chuan nikum December thla khan kum chhiarna atana international standard hmanna tur dan hi a lo pawm tawh a ni. Nikum September thlaa sorkarin zir chianna a neihah, an ram mipui zinga 86% chuan international standard hi hman an duh zawk a ni.