Russia-in an rama Israel palai hnenah lungawi lohna thu a thlen

Russia chuan an rama Israel palai chu Thawhlehni khan koin, Ukraine rama Israel palai thusawi dana a lungawi loh thu a hrilh.

Russia foreign ministry chuan hemi chungchangah hian thuchhuah siamin, kar liam taa Ukraine-a Israel ambassador, Michael Brodsky-a'n Ukraine mi tam takin Soviet Union beitu, Nazi puituite an ngaihsan leh an zahna chhan chu a hriathiam tak thu a sawi a ni, a ti. Brodsky thusawi danah hian Russia a lawm lo hle a, Russia leh Israel chu history siam ṭha tura lo thawk dun reng tawh niin, Nazi thurualpuite faktute chu midangte rilrua Russia huatna tuh tumnaah a ngai tih a sawi. Hei vang hian Russia-a Israel palai, Ronen Kraus chu koin, Brodksy thusawi dana an lungawi loh thu hi an hrilh a ni.

Kar liam ta khan Russia foreign ministry thupuangtu, Maria Zakharova chuan Brodsky chu 'Nazism' chawisangah a lo puh tawh bawk a, hetianga Brodsky-a'n ngaihdan a nei a nih chuan Israel foreign ministry tana thil pawi tak tur a ni ti zawngin a sawi.

Israel foreign ministry chuan Zakharove thuchhuah hi a chhang tawh bawk a, "Israel policy a la danglam lo a, Juda mi tam tak suattu Nazi leh a thurualpuite fakna chu a dodalin a la hnawl reng a ni," tiin ministry thupuangtu Kior Haiat chuan a sawi a ni.

Russia leh Ukraine indo hnuah Israel ram pahnihte nena an inlaichinna hi vawn nun zel a tum a, hei hi ngai thei loin Russia leh Ukraine hian an sawisel fo a ni. Tunkar tir lam khan Israel-a Ukraine ambassador Yevgen Korniychuk chuan Israel policy hi na taka sawiselin, Russia thlawpah a puh a, Putin leh a kaihhruaite chet dana a ngawi reng niin Israel a puh.