Canada ram kangin carbon ton mtd 160 tichhuak tawh

Canada ram kang nasa avanga mei khu chuan an ram chauh ni loin, US-a khawpui ṭhenkhatte a nghawng a, mei khu nasa tak avangin boruak a bawlhhlawh tawh hle.

Thawhlehni thleng khan ram kangin carbon a tihchhuah hi ton mtd 160 a tling tawh tih European Union's Copernicus Atmospheric Monitoring Service chuan a sawi a, mei khu hian Europe ṭhenkhat pawh a thleng niin an sawi bawk.

Canadian Inter-agency Forest Fire Centre chuan kumina an ram khawchhak leh khawthlang lama ram kang chu an ram chanchina ram kang a thlen nasat ber ṭum a nih thu a sawi. Thuneitute chuan kuminah ram kang hi hmun 3,000 dawnah a awm tih sawiin, heng zinga hmun 500-te chu ṭhelh mih an la ni lo tih an sawi bawk. Ram kang hian ram hectare mtd 7.7 a kang chhe tawh a, hei hi kum 2016, 2019, 2021 leh 2022-a ram kang zawng zawng belh khawm ai pawhin a zau tawh zawk a, US-a South Carolina state tiat zet a ni.