France tualchhung buainain zual lam la pan zel

France rama police-in taxi driver a kah hlum avanga tualchhung buaina chhuak chuan zual lam a pan zel.

Ningani zan khan a zawna a zan thumna atan khawpui hrang hrangah buaina a chhuah chhunzawm a, European Union summit hmanga Belarus rama zin, President Emmanuel Macron pawhin a cham hun titawiin an ramah a kir a, nimin khan crisis meeting a ko.

Police-te chuan khawpui hrang hranga buaina chhuaka inhnamhnawih mi 667 an man tawh a, lungawi lohna lantirtute hian motor, school, dawr leh bank-te an hal a ni. Police-te'n an man zinga a tam zawk hi kum 14-18 inkarte an ni. Mipui pungkhawm leh police-te innawr buainaah police 250-in hliam an tuar bawk.

Transport minister Clement Beaune chuan Ningani zana mipui pung khawmte hian Paris khaw dai, Aubervilliers-ah warehouse halin, bus 12 a kang chhe vek tih a sawi. Pung khawmte'n transport service-te an bei nasa zual tih sawiin, hetianga an chetna chu pawmzam mai a ni dawn lo tih a sawi a, "A tuartu ber chu heng service mamawh mipuite an ni," a ti.

Police-te'n an kah hlum, Nehal-a nu Mounia chu Ningani khan Nanterre-ah nawrh huaihawtnaah a tel a, a fapa tan rorelna dik hmuh ngei a tum tih a sawi. Hemi rual hian, "Police-te chungah ka thinrim lo. Mi pakhat, ka fapa nunna min laksaktu chungah chauh ka thinrim a ni," tiin Ningani zana an kawmnaah a sawi. He thil thleng hi police pum dik loh vang ni loin, mi pakhat tihdik loh vang a ni, a ti. "Nahel kha Arab a ang em a, a kap hlum mai a ni," tiin a sawi.

Nahel kap hlumtu police hi man a ni tawh a, a lawyer chuan officer hian kah hlum a tum lo a, en dik an tum laia Nahel hi a tlanchhiat avangin police dangte suin, midang nunna a tihderthawn avangin danin a phalsak chin angin a che niin a sawi a, Nahel chhungte pawh a tawrhpui thu a sawi a ni, a ti.