Syria indona avanga chin hriat loha awmte chungchang chhui dawn

United Nations General Assembly chuan Syria tualchhung indona thleng vanga chin hriat loha awm, mi nuai 1.3-te chungchang chhuina tur resolution a pawm.

UN chuan chin hriat loha awmte independent body chhuitir tura resolution siam hi UN chuan Ningani khan a ngaihtuah a, member ram 193 zingah resolution thlawp lamah 83 in an vote a, a thlawp lo lamah vote 11 awmin, member 62 erawhin vote an thlak lo.

Resolution thlawp lo lamah hian Syria bakah Russia, China, Belarus, North Korea, Cuba leh Iran an tel.

UN-in a pawm tak, resolution-ah hian Syria tualchhung indona a thlen aṭanga kum 12 hnuah pawh an chhungte chin hre lo awm mi tam takte chuan thuneitute lam aṭangin chhanna dawn mumal an la nei lo a ni, a ti. UN enpuina hnuaiah Syria ramah Independent Institution of Missoin Persons din a, chin hriat loha awmte chungchanga chhui chian a an chhungte pawh theihtawpa pui tura tih a ni.

Institution dinna tur hian UN Secretary General, Antonio Guterres chuan ni 80 chhungin kaihhruainate siamin, a hma thei anga din a, hnathawk nghal tura tih a ni ang tih a sawi.

Syria buaina hi a kum 13-na a ni tawh a, tualchhung indona thlengah hian mi nuai 5 dawn an thih bakah, an ram mipui zahve dawn chuan an in leh lo an tlanchhiat san bawk. International Commission on Missing Persons chuan kum 2021 khan tualchhung buaina chhuak vang hian chin hriat lohin mi nuai 1.3 vel an awm tih a lo sawi tawh a ni.