HRW-in danin a phal loh, chilpuah bomb hmangah Ukraine puh

Human Rights Watch (HRW) chuan Ukraine sipate chu an ram beitu, Russia siapite an beih letnaah danin a khap, anti-personnel landmine hmangah nimin khan a puh a, an puhna finfiahna tur pawh an nei tih a sawi.

HRW chuan Ukraine sorkar hnenah, hmana hetiang ralthuam hmang lo tura a lo intiamna chu vawng turin a ngen a, danin a khap ralthuam hmangtute hi chhui zui a, mawhphurtute chu hrem ngei turin a ngen bawk.

"Ukraine sorkarin a sipaite'n danin a khap, anti-personnel mine hmangtute chhui zui a tiam chu civil mite venhimna tura a mawhphurhna hlen chhuahna atan a pawimawh hle a ni," tiin HRW arms director Steve Goose chuan a sawi. HRW hian an thil hmuh chhuah chungchang hi May thla khan Ukraine sorkar hnenah a hriattir tawh a, tun thlengin chhanna an la dawng lo.

Ukraine hian kum 2005 khan mine leh hetiang chi hmanrua stock-te tichhe vek tura 1997 international treaty siam chu a lo zawm tawh a, mahse, Russia erawh chuan he treaty hi a zawm ve lo thung. HRW chuan kum 2022-a Ukraine a run hnuah, Russia sipaite hian anti-personnel mine chi 13 an hman thu report paliah a lo tarlang tawh bawk a ni.