France rama buaina chhuak kaihhnawihah mi 719 man belh leh

France rama police officer pakhatin taxi driver a kah hlum avangin Inrinni khan a zan ngana atan mipuite'n buaina an siam zui leh a, hemi zana buaina chhuak kaihhnawihah hian police-te chuan mi 719 an man belh leh a, buaina chhuak erawh a ziaawm chho tawh niin official-te chuan an sawi.

Kar liam ta Thawhlehnia Paris khaw dai, Nanterre-a taxi driver, kum 17 mi Nahel kah hlum a nih avanga lungawi lohna lantirtu, mipuite chuan khawpui hrang hrangah pawikhawihna thlenin, motor leh inte halin, dawr leh bazar hmupui bakah, bank outlet-te an suasam tel bawk.

Inrinni zan khan pung khawm zinga ṭhenkhat chuan Paris chhim lama L'Hay-les-Roses mayor chenna in chu motor-in an su a, he thil thlengah hian mayor nupui leh a fa pakhatin hliam an tuar. Mayor Vincent Jeanbrun chuan a chhungte mut laiin a in hi motor-a an sutsak bakah, a hal zui niin a sawi.

Thuneitute chuan khawpui hrang hrangah dan leh thupek kengkawh turin police 45,000 chuang an duty-tir a, sipai motor leh helicopter hmangin khawpui lian - Paris, Lyon leh Marseille-te an vil reng bawk.

Finance Minister Bruno Le Maire chuan buaina siamtute hian shopping mall 10, supermarket 200 chuang, tobacco shop 250 leh bank outlet 250 beiin an rawk bawk tih a sawi. Grigny-ah chenna in an hal bawk a ni.

Buaina chhuak kaihhnawihah police-te chuan Inrinni zanah mi 719 man belh lehin, a hmaa an la man tawhte nen mi 1,300 chuang an man tawh.

President Emmanuel Marcon chuan an rama buaina thleng vang hian nimina Germany ram a tlawh tur pawh a ṭhulh a ni. A hmain European Union summit hmanga a zin chhuak chu buaina thleng vang hian a zin hun pawt tawiin an ramah a kir leh nghal bawk a ni. Buaina siamtu tam ber chu tleirawl rual an nih avangin President hian buaina ṭha a awm a, tharum thawhna thlengte tihtawp a nih theihna tura hma lak pui turin nu leh pate leh social media lam pawh a lo ngen tawh a ni.

Tualchhunga buaina chhuak vang hian Paris khaw dai, Stade de France-a concert neih tur pahnih chu ṭhulh a ni a, nimina LVMH fashion house, Celine-in 2024 menswear show a neih tur pawh ṭhulh a ni bawk.