Myanmar Supreme Court-in Suu Kyi-i appeal-na ngaihtuah dawn

Myamnar Supreme Court chuan an ram hruaitu paihthlak tak, Aung San Suu Kyi-i'n a thubuai hrang hranga thiam loh chantir a, kum 33 tang tura hremna a pek chungchanga a appeal-na chu July 5 hian a ngaihtuah dawn niin Suu Kyi-i legal official-te chuan an sawi.

Suu Kyi thubuaite hi kum 2021, February thlaa sipaite'n civil sorkar thuneihna hnehchhuh a, sorkarna an siam hnua an siamsakte a ni.

Sipaite hian thuneihna an chan hnuah kum 78 mi, Suu Kyi hi manin an hreng nghal a, thubuai hrang hrang an siamsak zui bawk. Suu Kyi leh amah thlawptute chuan sipai sorkarin an puhna hrang hrangte chu thu dik lo a ni tih sawiin, politics khel chhunzawm thei lo tura hrekbeh a ntumna niin an puh.

Suu Kyi hi a tirah chuan house arrest-a hren a ni a, mahse, a hnuah Nay Pyi Taw-a tan-inah dah a ni. Man a nih hnu hian mipui hmuha thu sawi khapsak a ni a, a lawyer-te pawh a case chungchang hi chanchinbute hmaa an sawi khap a ni bawk.

Legal official-te chuan July 5-a Supreme Court-in Suu Kyi appeal-na a ngaihtuah tur hi, inthlanpuia dik lo taka thil ti-a puhna leh official secret act bawhchhiaa puhna chungchanga an hremna a ni tih an sawi. Nikum September thla khan heng thubuai pahnihah hian kum thum ve ve tang tura hrem a ni.