Israel-in Jenin refugee camp-ah beihpui thlak

Israel sipaite chuan Pathianni zan aṭang khan West Bank hmar lama Jenin refugee camp-ah airstrike a nei a, nimin zing thleng an la bei chhunzawm.

Israel Defence Force (IDF) thupuangtu, Brig-Gen Daniel Hagari chuan Jenin bikah an la insawrbing tih sawiin, a ṭul dan azirin West Bank hmar lam, Samaria-ah pawh Palestinian firfiakte laka beihpui thlak chhunzawm a la ni maithei tih nimin zing khan a sawi.

Israel sipaite'n beihpui an thlaknaah hian Palestinian firfiak pasarih an thi a, hliam eng emaw zat an awm bawk nia sawi a ni a, mahse, thi leh hliam zat hi an la pun chhoh rin a ni. Israel sipai pakhat chuan hliam a tuar bawk a, damdawi-inah dah luh a ni.

Hagari chuan eng chen nge beihpui an thlak dawn tih a sawi lang lo a, mahse, ni eng emaw zat a awh rin a ni. Thlawhtheihna hmanga an beih bakah, Israel sipaite hian motor nen Jenin refugee camp hi an hual bawk a, lei lam aṭang pawha beiin kawng leh chenna in ṭhenkhat pawh a chhia nia sawi a ni bawk. Sipaite hian improvished rocket launcher bakah ralthuam dang eng maw zat an man a, puakthei thil siam leh dahna hmun laboratory pawh an tichhe bawk niin IDF thuchhuah chuan a tarlang.

Israel sipaite hian beihpui an thlaknaah Palestinian Authority security force-te bei tel lo turin fimkhur takin hma an la tih Hagari chuan a sawi a, an beihpui thlak chu PA lakah ni loin Jenin-a firfiak pawl lakah chauh a ni tih sawiin an pawl hming erawh a sawi lang lo. Report ṭhenkhatin IDF in Jenin-a Freedom Theatre an bei tel nia an tarlan chu thudik lo a nih thu Hagari chuan a sawi bawk.

Jenin khuaah hian Palestinian 49,000 vel an cheng a, an zinga 18,000 chu refugee camp-ah hian an khawsa a ni. Kum 2022 leh kuminah refugee camp-a chengte hi Israel beihnaa an inhnamhnawih fo a, Israel pawhin he hmuna Palestinian firfiak awmte lakah beihpui a lo thlak fo tawh bawk a ni.