Pakistan-in IMF aṭangin USD tld 3 loan lak belh dawn

Leiba ngah avanga buai mek,Pakistan chuan thla kua chhungin International Monetary Fund (IMF) aṭangin loan, USD tluklehdingawn 3 a la thei dawn ta.

Kum 1947-a an independence hnua sum leh pai lama an dinhmun chhiat ber ṭum tawng mek, Pakistan hian an harsatna aṭanga inkhai chhuahna turin IMF aṭanga loan lak tumin an buaipui a, hun rei tak an buaipui hnuah an inrem thei ta a ni. Loan an lak belh leh tur nen hian, Pakistan hi IMF sum puk hnem ber ram palina a ni dawn.

Argentina chu IMF aṭanga loan puk hnem ber ram ni mekin, USD tld 46 a la tawh a, Egypt-in dawtin USD tld 18 loan a la a, Ukraine chu pathumna niin IMF aṭang hian USD tld 12.2 loan a puk tawh a ni. USD tld 8.2 puktu, Ecuador chu Pakistan hian a loan thar tur hmangin a rawn pel dawn a, USD tld 3 a lak belh tur nen Pakistan hian IMF aṭang hian loan hi USD tld 10.4 a la tling thei dawn a ni.

IMF aṭang hian ram 93-te'n loan an puk mek a, kumin March 31 thleng khan IMF-in loan a pek chhuah hi USD tld 155 a tling. Hetih lai hian USD tluklehdingawn 1 chuang ba hi ram 19 chauh an awm thung.