China rama tuilian avangin in 2,000 chuang chhia

China-a central province, Huxan-ah ruah sur nasa avangin tuilianin chenna in 2,000 a chhia a, mi 10,000 chuang chu hmun him lamah insawn chhuah ngaiin an awm. Thlai chinna hmun zau tak tuilian hian a chim bawk.

Thuneitute chuan tuilianin thil a tihchhiat hi an ram pawisa, yuan mtd 575 (USD mtd 79) hu a tling tih an sawi.

Hmar lama Shaanxi province-a Zhenba county-ah pawh kum 50 chhunga tuilian nasa ber an tuar a, kawngpui leh in eng emaw zat tui hian a len chhe tawh. Tuilianin chhiatna a thlenah hian thi erawh an awm lo nia sawi a ni.

China ram hian nipui laiin tuilian an tuar fo a, khaw lum zualna province 11-ah ruah nasa takin a la sur chhunzawm dawn niin khawchin zirtutte chuan an sawi.

Kum 2021 khan Henan province-ah tuilian vangin mi 300 chuang an lo thi tawh a, hemi kum July 20 khan province khawpui Zhengzhou chuan ruah tui a tlak nasat ber record siamin, lui lianin khawpui chhung a chim nasa a, subway line-ah pawh tui a lian a ni. China ramin tui lian a tawrh nasat ber chu kum 1998 kha niin, mi 4,150 an thi a ni.