Taxi driver kap hlumtu France police officer tan fund siam; Mi 50,000 chuangin USD mtd 1 chuang an thawh khawm

France rama police officer pakhatin taxi en dik a tum laia a tlanchhiat avanga a driver a kah hlum avanga tualchhung buaina a thlen mek karah, far-right politician Marine Le Pen-a'n police officer tana GoFundMe-a sum thawh khawmna tur a buatsaihah euro 9,63,000 (USD mtd 1.05) an hmu tling tawh.

June 27 khan police officer hian kum 17 mi, taxi driver, Nahel M chu a motor en fiah an tum laia a tlanchhiat avangin a kap zui a ni. Nahel ka hhlum a nih avang hian France rama khawpui hrang hrangah lungawi lohna lantirin, pawikhawihna nasa tak an thlen zui a ni.

Hetih lai hian Marine Le Pen hian GoFundMe-ah tualthattua puh, police officer tan sum thawh khawmna tur a lo buatsaih thung a, mi 50,000 chuangin pawisa hi an thawh khawm tawh a ni. Mimala thawh hnem ber chuan USD 3,000 a pe. Thawhṭanni tlai thleng khan USD mtd 1 chuang an thawh khawm tawh a ni.

Centrist leh left-wing politician leh activist-te chuan police officer puala fund siam an sawisel nasa hle.

Socialist Party hotu Olivier Faure chuan GoFundMe hnenah an sum thawh khawmna siam chu titawp turin a ngen a, thil zahthlak tak an kalpui tih a sawi. France activist group, Sleepeing Giants pawhin fund lo siam hi rorelna dik lo taka kalpuina leh buaina tihpunlunna a ni, an ti.

Kum 2019 khan sorkar laka lungawi lohna lantir a, yellow-vest movement kalpui ṭuma police officer ṭhenkhat beia lo hnektu, boxer hlui pakhat tan fund siam a lo ni tawh bawk a, mahse, reiloteah an titawp zui a ni.

Police officer-in a kah hlum, Nahel M chhungte tan fund siam a ni bawk a, mi nuai khat chuangin sum thawh tawhin, an sum hmuh hi USD nuai 2 vel an hmu tawh.