Israel sipaite'n Jenin khua an chhuahsan

Israel sipaite chuan Palestinian ram a luah, West Bank-a Jenin refugee camp-a Palestinian firfiakte laka beihpui an thlak chu an zo tawh nia sawiin Thawhlehni zanlai khan Jenin khua an chhuahsan fel.

Jenin khuaa beihpui an thlaknaah hian Palestinian mi 12 an thi a, mi 120 chuangin hliam an tuar. Israel sipaite'n an kah hlum mi 12 zinga a tam zawk hi firfiak, Israel beihnaa inhnamhnawihna nei niin an sawi. Inbeihnaah hian Israel sipai pakhat a thi bawk.

Israel sipaite'n an chhuahsan hnuah Palestinian mi tam tak chuan Jenin kawtthlerah leh refugee camp-ah a lawmna kawng an zawh a, tualchhunga armed group, a bikin Jenin Battalion an thlawpna thute an aupui a ni. Jenin Battalion hi Iran thlawp, Palestinian Islamic Jihad (PIJ) enkawl nia sawi a ni, Israel sipaite'n beihpui an thlak dawn khan an commander tam zawk chu refugee camp-ah an tlanchhia a ni.

Palestinian kawng zawhte hian Jenin khuaa Palestinian security force headquarters chu lung leh puak thei thil hmangin an bei zui bawk a, Israel sipaite an luh hnuah Palestinian security force-te chu lo bei let ngam loa biruah an puh a, an mite venghim theh loah an puh a ni. Palestinian security force-te chu pung khawmte hnawh darh nan hian tear gas an lo hmang a ni.

Israel sipaite chuan ni hnih chhung Jenin-a beihpui an thlak chu an hlawhtling tih sawiin, firfiakte an thah bakah, thu zawh fiah turin mi eng emaw zat an man tih an sawi. Beihpui an thlaknaah khan helicopter gunship leh drone hmanga ṭum 15 an beih bakah, armoured military vehicle 150 an hmang a, elite special force 1,000 an thawk chhuak.

Jenin khua an chhuahsan fel hnuah, Israel sipaite chuan Gaza Strip aṭanga rocket hmanga Israel beih a nih avangin Gaza chu thlawhtheihna hmangin an bei leh leh nghal bawk. Gaza aṭang hian Israel beihna atan rocket panga kah chhuah a ni a, mahse, heng rocket-te hi an lo kah thlaksak vek a ni.