Drone hmanga beih vangin darkar 3 chhung Moscow airport khar

Russia chuan Thawhlehni khan Ukraine drone eng emaw zat hmanga an ram beih a nih avangin Moscow airport chu darkar thum chhung an khar.

Russia defence ministry chuan Thawhlehni khan Ukraine drone pali chu air defence system hmanga kah chhiat a nih thu leh, pakhat chu electronic countermeasure hmanga kah thlak a nih thu a sawi. Drone an kah thlak hian building pakhatah kangmei a tichhuak a, thi leh hliam erawh an awm lo tih sorkar hnuaia Tass news service chuan a sawi. May thla hnua unmanned aircraft hmanga an ram beihna nasa ber a nih thu a sawi bawk.

Drone an kah thlak zinga pakhat chu Vnukovo airport aṭanga km 36 vela hla, Kubika khuaah a tla a, pakhat chu airport bulhnai Valuevo khaw bulah a tla bawk a ni.

Moscow mayor Sergey Sobyanin chuan drone hmanga beih an nih avangin airport pawimawh, Vnukovo International Airport chu darkar thum chhung khar a ni a, flight 14 chu airport dangah tirh a nih thu a sawi. Russia hian a hmain Ukraine-in Moscow beihna atana drone pariat a tirh chu an kap thla tiin a lo sawi tawh bawk a ni.

Hetih lai hian Ukraine chuan drone hmanga Russia beihnaah hian inhnamhnawihna a nei lo tih a sawi thung.