June thla chhungin China-ah Covid-19 vangin mi 239 thi

China chuan June thla chhungin an ramah Covid-19 hri vangin mi 239 an thi tih nimin khan a sawi.

Chinese Centre for Disease Control and Prevention-in report a tihchhuahah, May thla khan hripui vanga thi hi mi 164 an awm bawk a, April leh March-ah erawh hri vanga thi an awm lo.

Covid-19 hri a len hnuah China kum 2020 kumtir aṭangin hri darh tur venna atan inkhuahkhirhna khauh tak, 'zero-Covid' policy a kalpui a, lockdown, quarantine, ramri khar leh mass testing-te a kalpui a ni. Hun rei tak inkhuahkhirhna khauh tak an kalpui hnuah sawiselna a tam tak avangin nikum December thla khan a thlahdul chho ṭan a ni. Mahse hemi hnu hian hri hi an ramah leng thar lehin, hripui vanga thi hi mi 60,000 vel an awm belh leh nia sawi a ni. January leh February thla khan a hluar leh a, January 4 khan hri vanga thi hi mi 4,273 an awm. February thla chawhnu lam aṭangin a ziaawm chho leh ta niin Chinese CDC chuan a sawi.

World Health Organisation-in a tarlan danin, kum 2020, January 3 aṭanga 2023, July 5 inkarah China ramah hian Covid-19 hri kai 9,92,92,08 an awm a, an zingah 1,21,490 in an thihpui a ni. Hetih lai hian expert-te chuan official-te tarlan aiin China ramah hri vei leh thihpui hi an tam hle a rinawm thu an sawi.

China-a Wuhan province aṭanga Covid-19 hri a darh hnu khan thuneitute chuan hri leng chungchangah media lam an khuahkhirh nghal a ni. Tun karah pawh Covid hri len hluar lai kaihhnawih thil tarlangtu, online media outlet pahnih an block leh.

March thla aṭang khan internet regulator, Cyberspace Administration of China chuan self-publishing media-te kaihhruaina tur dan khauh tak siamin campaign a kalpui a ni. Thla thum chhungin website 4,000 leh apps 55 an tihtawpsak tawh.

Thuneite'n online media outlet an block thar zinga pakhat hi Health Insight and Media Cam social media account niin, tihtawpsak an nih chhan engmah hrilh fiah an ni lo. Health Insight hi kum 2018-a din niin WeChat, Weibo leh Zhihu-ah an post ṭhin a, heng account pathumte hi tihtawp vek an ni. Anni bakah outlet dang Media Camp chu block a ni bawk.