Myanmar Supreme Court-in Suu Kyi-i appeal-na ngaihtuah

Myanmar Supreme Court chuan Nilaini khan a ram hruaitu hlui, Aung San Kyi-i'n thubuai hrang hranga hremna pek a nih chungchang a appeal-na a ngaihtuah.

Kum 2021, Ferbuary thlaa Myanmar sipaite civil sorkar thuneihna an hnehchhuh hnuah, Suu Kyi leh hruaitu ṭhenkhat chu man an ni nghal a ni. Suu Kyi hi sipaite chuan thubuai hrang hrang an siamsak zui a, heng zingah hian sipai sorkar laka hel tura mipuite fuiha puhna, eirua puhna, inthlana dik lo taka thil ti leh Secret Act bawhchhiaa puhnate pawh a tel. A thubuaiah hian thiam loh chantir vek a ni a, thubuai hrang hranga an hremna aṭang hian kum 33 chhung lung in tang tura tih a ni.

Kum 78 mi, Suu Kyi chuan jail tang tura hremna pek hi tinep tura ngenin, court-ah a appeal a ni. Nilainia a appeal-na ngaihtuah a nih ṭum hian Suu Kyi hi court-ah a inlan lo a, a lawyer-te chauh an kal a ni. Court hian thla hnih chhungin thutlukna a siam rin a ni.

Sipaite'n hian Suu Kyi hi pawn chhuak thei loa an hren hnua, an ram khawpui Naypyitaw-a tan inah a hrangin an khung leh a ni. A lawyer-te pawh hrekin, a thubuai chungchang chu media leh foreign organisation-te hmaa an sawi an khapsak a, nikum December 30 aṭang khan a lawyer-te nen pawh hmaichhanah an inhmu tawh lo bawk.