SAfrica-ah gas put vangin mi 16 an thi

South Africa-ah Nilaini zan khan gas put vangin mi 16 an thi a, thi zingah hian naupang pathum an tel.

Police-te chuan he thil thlenna hi Johannesburg khaw chhak lam, Boksburg khuaah niin an sawi. Mi 16 an thih bakah, mi pahnih chu enkawl turin damdawi inah hruai an ni bawk.

Boksburg khua hi nikum Krismas urlawk ni-a gas phurtu truck puak vanga mi 41 an thihna hmun kha a ni.

Emergency service thupuangtu, William Ntladi chuan Angelo biala chenna in pakhata gas cylinder aṭanga gas put vangin he vanduaina hi a thleng niin an sawi. Gas a put tih hriat a nih veleh police team an kal nghal a, gas put pawh tihtawp nghal a ni tih a sawi.

Guateng province premier Panyaza Lesufi chuan gas putna hmun hi nimin khan a tlawh nghal a, eng ang gas nge put tih leh, a put dan hi chhui chian mek a ni tih a sawi. Media report chuan gas hi phalna loa rangkachak khura thawkten chenna aṭanga put niin an tarlang.