El Savador President hlui kum 6 tang turin hrem

El Salvador court chuan an ram President hlui, Mauricio Funes chu chhiah awl rua puhna thubuaia thiam loh chantir a nih hnuin, kum ruk tang turin Nilaini khan a chungthu a rel.

Funes hi Nicaragua ramah a khawsa mek a, chhiah a awl chungchangah hian thla khat liam ta khan court chuan thiam loh a chantir tawh a ni. Prosecutor-te'n kum riat tantir turin an phut a, mahse, court chuan kum ruk tang turin a hrem a ni.

May thla tawp lam khan tribunal chuan Funes hi thuneihna a chan laia street gang hlauhawm tak takte nen inzawmna neia puh chungchangah kum 14 tang turin a lo hrem tawh bawk.

Kum 2009-2014 inkara El Salvador hruaitu, kum 64 mi Funes hian thubuai dang eng emaw zat a nei bawk. Nicagarua ramah hian tlanchhiain, kum 2019 khan citizenship pek a ni.

Funes hi Salvador President ni tawh zingah thuneihna chan laia dan kalha chet chungchanga jail tang tura hrem pahnihna a ni. Kum 2018 khan President hlui Tony Saca pawh sorkar sum, USD mtkd 300 chuang pawt penga puhin kum 20 tang tura hrem a ni tawh bawk.

Prosecutor-te chuan Funes hian a president kum tawpna, 2014 khan chhiah, USD 85,000 a awl ru niin an puh a, court chuan USD nuai 2 chawi turin a lo ti tawh a ni.