Russia-in an ram a run ni 500-naah Ukraine President-in Snake Island a tlawh

Ukraine president Volodymyr Zelenskyy chuan Russia-in an ram a run ni 500-na, kar liam ta Inrinni khan Snake Island a tlawh a, indonaa Ukraine sipai thite zahna a hlan.

President Zelenskyy chuan he island leh Ukraine ram pum venghim tura bei a, an nunna hlantu sipai leh midangte chu an zahin an chungah an lawm takzet tih a sawi a, Snake Island-a thuneihna an chan chu Ukraine ram pumah thuneihna an chang leh dawn tih lantirna a ni, a ti. "Ni 500 chhunga an inpekna avangin kan sipai tinte hnenah he hmun, hnehna kan channa hmun aṭang ngei hian lawmthu ka hrilh a ni," a ti.

Russia sipaite chuan Ukraine an run ni, kum 2022 February 24 khan he thliarkar hi an la a, he hmun hi Ukraine lawngchawlh hmun lian ber leh navy headquarters awmna, Odese beihna tura ṭanhmun atan hman an tum a ni. Mahse Ukraine sipaite chuan bomb nen Russia sipaite hi nasa taka bei letin, kum 2022 June 30 khan an la let leh a ni.

Ukraine khawchhak leh chhim lamah Inrinni khan Russia leh Ukraine sipaite an inbei leh. Donetsk region governor, Pavlo Kyrylenko chuan Russia sipaite chuan Lyman khua chu rocket-in a kap a, civil mi paruk an thi a, mi dang panga an hliam tih a sawi.

United Nations chuan Ukraine-a ni 500 chhung indona thlengah hian civil mi 9,000 in nunna an chan tawh tih a sawi. Hei hi an hriatchian theih zat a ni a, hemi rual hian official record-a tarlan aiin indona vanga thi zat hi an la tam zawk hle a rinawm thu a sawilang nghal bawk.