Israel-ah Justice bill thar duh lohna lantir leh

Israel sorkarin judicial system siamṭhat a tumna duh lohna lantirin, kar liam ta Inrinni khan Tel Aviv leh khawpui hrang hrangah nawrh huaihawt chhunzawm leh a ni.

Nikum December thlaa lakluh, prime minister Benjamin Netanyahu kaihhruai ṭangrual sorkarin judicial system siam danglam a tumna hi eptu pawl leh mipui tam takin dodalin, hun rei tak chhung chu kar tawp apiangin nawrh an huaihawt ziah a ni.

Kar liam ta Inrinni-a Tel Aviv-a nawrh huaihawt hi a ṭum 27 na a ni a, mi nuai 1.5 an pungkhawm niin media lam chuan an tarlang. Pungkhawmte chuan sorkarin a thiltih tum hi a tawpsan loh chuan, an thinrim eng ang takin nge an chet dawn tih a hmu thuai dawn tih an sawi.

Police-te chuan pungkhawmte hnawhdarh nan hian water cannon te an hmang.

Judicial system siamṭhat tumnaah hian dan hmanga rorelnaah court thuneihna tih nep a, politician-te thuneihna sang zawk pek tum a ni. Sorkar chuan thuneihna rualkhai taka kalpuina turin hei hi a ṭul niin a sawi.

PM Netanyahu chuan March thla tawp khan eptu party-ten nen inremna kawng zawnga inbiakna an neih theihna atan judicial system thlak danglam tumna chu chawlhsan rih a lo remti tawh a ni. Mahse inbiakna hian awmzia a nei thei lo tih sawiin, thla hmasa aṭang khan rawtna thar a siam leh a, hei vang hian a duh lo lamin nawrh huaihawt pawh nasa zawkin an kalpui ve leh bawk.

Vawiin hian Israel Parliament, Knesset-ah Justice bill hi first reading neih a ni ang.