France-ah police laka lungawi lohna lantirin rally huaihawt lui

France khawpui, Paris-ah kar liam ta Inrinni khan police-ten an khap chungin, kum sarih liam taa police kuta a awm laia mihang, Adama Traore thihna thleng avanga lungawi lohna lantirin rally huaihawt leh a ni.

Kar liam ta chhung khan Paris khaw dai, Nantere-a police officer-in Algerian leh Moroccan thlah pawlh, kum 17 mi Nahel M a kah hlum avangin ram chhung khawpui hrang hrangah buaina nasa tak a lo chhuak tawh bawk.

Police-te chuan Nahel M thihna avanga buaina nasa tak a chhuah hlim a nih avangin, Inrinnia kawng zawh tum pawh hi boruak ṭha lo a chawh chhuah hlauhthawn avangin an khap a,mahse heti chung hian mi eng emaw zatin kawng hi an zawh lui ta tho a ni.

Paris-a kawngzawhnaah hian mi 2,000 vel an pungkhawmk. Kawng zawh zinga pahnih chu man an ni.

Ram chhung hmun danga kawng zawhnaa buaina chhuakah mi 30 vel man an ni bawk. Kawngzawh hi trade union, political party eng emaw zat leh assocation hrang hrang chuan an thlawp a ni.

Interior minister Gerald Darmanin chuan kar liam ta chhung khan ram chhung hmun hrang hranga buaina chhuakah mi 3,000 chuang man an ni a, an zinga a tam zawk chu tleirawl/rawlthar an ni tih a sawi. Nawrh huaihawtte hian buildign 2,500 vel an tichhia tih a sawi bawk.