Trump leh Biden-ten debate hmasa ber nei

US President thlanna neih tura candidate pahnih, President ṭanglai leh Republican candidate Donald Trump leh Democrats candidate Joe Biden-te chuan nimin zing, an ram huna Thawhlehni zan khan hmaichhana debate hmasa ber an nei a, ṭawngkam pawh an hmang na hle. He debate hi kum eng emaw zat presidential debate neih tawh zinga mumal lo leh mimal inhuatna lantirna nasa ber zingah an sawi  hial. 

Cleveland, Ohio-a minute 90 chhung debate neihah hian candidate pahnihte hi Covid-19 hri leng mek chungchang, white supremacy,  US khawpui hrang hranga nawrh leh tharum thawhna thlen leh economy chungchanga an ngaihdante an sawi a, mahse thusawi mumal thei loin an inaubuai fo a,  an ṭawngkam hman pawh an duhtui lo dun hle. 

Moderator leh Fox news anchor Chris Wallace chuan candidate pahnihte chu an thusawi lai an intihbuai tawn chhen avangin a tu zawk zawk pawh midang thusawi lai lo tibuai lo turin a hrilh hial. 

Joe Biden chuan President Trump chu 'clown' tia koin ngawi turin a hrilh a, America-in president a nei tawh zingah a chhe ber a nih thu a hrilh. Biden hian Trump hi 'dawthei', 'racist, leh 'Putin's puppy' ti tein a ko. Trump hian Biden-a fapain ruihhlo a khawih chungchang a sawichhuak ve bawk. 

An rama coronavirus leng mek chungchangah Biden chuan Trump-a rorel dan chu na takin a sawisel a, mi nuai hnih chuangin he hripui an thihpui tawh chunga Trump-a'n khuahkhirhna hlip a, economy hawn leh a duh chungchang chu sawiselin, "A fin var (smart) thuai loh chuan mi tam tak an la thih belh dawn a ni," a ti. Trump chuan 'smart' tih ṭawngkam chu a lakah hmang lo turin a lo ti zui nghal a ni. 

Moderator-in white suprema­cist-te demna thu a sawi dawn em tia a zawhna chu President Trump chuan inthlaveng takin a chhang a, a demna thu tak erawh a sawi tel lo. 

Inthlan neih dawn hnaiha Supreme Court justice thar tura President-in Amy Coney Barret a nominate chungchang pawh sawi niin, Biden chuan Barrett chu mi ṭha tak niin lang mah se a hun rih lo niin a sawi. Trump chuan a ruat chhan chu thil awlsam tak, inthlana an chak a, kum li atana thlan tlin niin a ruat mai tih a  sawi thung.  

Thawhlehni zana debate neih hi candidate-te ṭawngkam chhe tak tak hmanga mimala an inbeihna a nasa a, debate hlawhtling lo leh mumal lo nia ngaitu an tam hle. Trump leh Biden hian inthlan neih hmain October thla chhungin debate vawi hnih an la nei leh ang. Anni bakah an vice president candidate. Mike Pence leh Sentoar Kamala Harris-te pawhin debate an la nei dawn bawk. 

Presidential debate hmasa bera moderator, Chris Wallace chu debate a kaihhruai danah sawisel a tawk a, tun ṭum hi presidential debate a kaihhruai vawi hnihna a ni. 

Moderator hian candidate pahnihte inhnialbuai a ṭhelh hleih theih loh a awm fo a, hei bakah  President Trump chu chhaihbuai a tum tel nia ngai mi tam tak an awm.