China-a kindergarten beihnaah mi 6 an thi
China chhim chhak lam, Guangdong province-a Lianjiang khuaah nimin khan mi pakhatin kindergarten a bei a, mi paruk vit hlumin an zingah hian KG zirlai pathum an tel.
Police-te chuan pawikhawihtu nia puh hi an man nghal a, kum 25 mi Wu tih a ni a, tum reng vanga ti niin an sawi. Mahse a pawikhawih chhan tak erawh an sawi lang lo.
He thil thlen hun hi an ram huna zing dar 7:40 niin, nu leh pate'n summer class nei tura an fate an thlah lai a ni. Kindergarten beihnaa thi zingah hian an fate hruaitu mi pahnih bakah, zirtirtu pakhat a tel bawk.
Lianjiang khuaah hian mi maktaduai 1.87 vel an cheng a ni.
China hian silai khuahkhirhna dan khauh tak a nei a, hetih lai hian chem hmanga inbeihna erawh a thleng fo thung. Kum 2010 hnuah chem hmanga school, college leh university beihna ṭum 17 vel a thleng tawh a, heng zinga a tam zawk chu kum 2018-2023 inkara thleng an ni. Nilum August thla khan Jiangxi province-ah kindergarten school chu mi pakhatin chemte nen a bei tawh bawk a, mi pathum vit hlumin mi dang parukin hliam an tuar. Kum 2021 April thlaa Beiliu City-a school beihnaah mi pahnih vih hlum an ni a, mi 16 in hliam an tuar a, kum 2018 October thla khan Chongqing-a kindergarten beihnaah zirlai 14 an hliam bawk. Zirna in beihna thleng ṭhina pawikhawihtu tam zawk chu mipa niin, khawtlang thila lungawi lohna neite an ni.