Japan-ah tuilian leh lei tawlh vangin insawn chhuak turin mipui hriattir

Japan rama ruah sur nasa tak avanga tuilian leh lei tawlh nasa tak thleng avangin nimin khan Kyuhu island chhim lam, Fukuoka leh Oita prefecture-a chengte chu hmun him lamah insawn chhuak tura hriattir an ni. Tuilian avang hian mi pakhatin nunna a chan tawh a, chin hriat lohin mi paruk an awm mek bawk.

Japan Meteorological Agency chuan emergeny warning tichhuakin, Fukuoka leh Oita-a cheng mi nuai 4.2 chuangte chu dinhmun hlauhawm taka an awm tih hrilhin, evacuation order sang ber, five-level order tichhukain mipuite chu a rang lama hmun him lama insawn turin a ti a ni.

Kar liam ta kartawp lam aṭang khan Kyushu leh Chuogku bialah ruah nasa takin a sur chhunzawm a, lui tam tak a len bakah, lei a tlawh nasa hle a, kawngte a ping a, rel service a bahlah bakah, hmun eng emaw zatah tui supply a tichhe bawk. Ruahsur nasa tak avang hian Hiroshima leh Fukuoka inkara bullet train service pawh tihtawp rih a ni.

Prime Minister Fumio Kishida chuan ruah sur nasa avanga harsatna tawkte ṭanpui leh chhanchhuah hna thawk turin task force din a nih thu a sawi a, sorkar chuan ruah sur leh a kaihhnawihin chhiatna a thlen dan kimchang hriat tumin hma a la mek a, mipuite nunna chhanhim chu a dah pawimawh ber a ni, a ti.

Ruah sur nasa tak hian Japan bakah Asia ram dang ṭhenkhatah pawh harsatna a thlen mek bawk. China hmar lam, ram laili leh chhim chhak lamah tuilian avangin mi sing tel chu hmun him lamah sawn chhuah an ni tawh a, central China-ah lei nasa tak a min hnuah chin hriat lohin mi pakua an awm mek bawk.