Mi 300 chuanna lawng pathum chin hriat lohin awm

Senegal aṭanga Spain rama Canary Islands pan, ram danga pem tum mi 300 vel phurtu lawng pathumte chu hun rei tak chin hriat lohin an awm tih migrant aid group, Walking Borders chuan Pathianni khan a sawi.

Mi 65 phurtu leh, mi 50-60 inkar phurtu lawng pahnihte chu Senegal an chhuah san aṭangin ni 15 chhung an chin hriat a ni tawh lo a, lawng pathumte hian mi 200 phurin June 27 khan Senegal a chhuah san a, hei pawh hi a chin hriat zui a ni tawh lo bawk.

Heng lawng pathumte hi Senegal chhim lam, Kafountine aṭanga chhuak niin, Spain pan tuma kal vek an ni. Mahse lawnga chuang chhungte chuan an ram an chhuah san aṭang hian an chhungte chanchin hi engmah an hre zui tawh lo tih an sawi.

Sub-Saharan Africa aṭanga ram danga pem tumte'n lawnga kalna kawng bera an hman, Atlantic migration route hi khawvela zinkawng hlauhawmna ber zingah a tel a ni. Ram danga pem luta kalte hi sangha manna lawngah te an kal mai ṭhin avangin Atlantic tuifinriata tuifawn na tak paltlanga zo lo a, che sual an awm fo a ni. UN International Organisation for Migration data aṭanga a lan danin, kum 2022 khan he kawng aṭanga Canary Islands pantu mi 559 chu tuipuiah an thi a, an zingah hian naupang 22 an tel. Kum 2021 khan mi 1,126 an lo thi tawh bawk.

Spain Interior Ministry chuan kum 2022 khan Africa ram aṭanga Canary Islands-a lut hi mi 15,682 an awm a, mahse, 2021 aiin 30% in an tlem zawk tih a sawi.