US secretary of state-in Japan, S Korea leh Mongolia tlawh dawn

US secretary of state Mike Pompeo chuan October 4-8 chhung hian Japan, South Korea leh Mongolia ram a tlawh dawn tih US Department of State chuan a puang.

Pompeo hi US leh China inkar boruak chhia hre chunga zin tur a ni a, a zin chhan tur hi Covid-19 chungchang vang leh Hong Kong leh South China Sea chungchanga China hmalakna US-in ṭha a tih loh vang nia sawi a ni. China-in a ram hnaih leh a chhehvel a rum ṭhaih chungchangte  thlithlai turin a zin dawn a ni.

Nikum July thla khan Pompeo chuan Thailand a lo tlawh a, hemi hnua helai ram bial a tlawh leh hmasak ber tur a ni. An ruahman lawk dan chuan October 4-ah hian Japan a tlawh dawn a, Mongolia hi October 6-ah a tlawh a nga, South Korea hi October 7-8 chhungin a tlawh dawn bawk a ni. 

October 6-ah hian Quad meeting vawihnihna neih tum a ni a, he hun hi a hmang nghal dawn a ni. Quad member hi Australia, India, Japan leh US an ni a, meeting-ah hian member ramte hian security chungchanga thawhhona tur an sawi ang. Pompeo hian South Korea a tlawh pah hian North Korea leh SKorea inhmuh thiam lohna neihte chu a sawi pui dawn niin media-te chuan an tarlang.