Vilnius-ah ni 2 awh tur NATO summit ṭan

Lithuania khawpui, Vilnius-ah nimin aṭang khan North Atlantic Treaty Organisation (NATO) summit neih a ni a, ni hnih a awh ang.

NATO secretary general, Jens Stoltenberg kaihhruaina hnuaia summit neihah hian Russia-Ukraine indona thleng mek chungchang leh, Ukraine-in NATO member nih a dilna chu an sawiho tur pawimawh zingah a tel.

Summit hi Vilnius-a Lithuanian Exhibition and Congress Centre, LITEXPO-ah neih a ni. Vilnius hi Russia khawchhak lam ramri aṭanga km 200 vela hla leh, Russia thurualpui Belarus ram aṭanga km 35 chauha hlaa awm a ni.

NATO-ah hian member ram 31 an awm mek a, member-te hian Ukraine an thlawpna thu leh, Russia demna thu pawh an sawi chhuah leh ngei rin a ni. Ukraine-in NATO official member a dilna chu member ramte chuan an thlawp laiin, eng hunah nge member-ah hian lak luh a nih dawn erawh an la sawi lang lo. Ukraine President Volodymur Zelenskyy pawhin NATO member ni turin an inpeih tawh hle tih a sawi rualin, indona thlen mek lai erawh chuan lak luh an nih a rinawm loh tih a hriatthiam thu a lo sawi ve tawh bawk.

Russia-in Ukraine a run hnuah, a ṭhenawm ram Finland leh Sweden-te pawhin nikum khan NATO member nih hi an lo dil ve tawh bawk a ni.