World Population Day : Kum 70 chhungin mihring awm zat a let 3-in pung

World Population Day hi khawvel pumah kum tin July 11-ah hman a ni ṭhin. Hemi ni hi mihring pung chak lutukin ram leh planet thlenga nghawng a neih dan inzirtirna hun atante hman a ni ṭhin.

Kumin World Population Day-ah hian thupui atan, “Unleashing the power of gender equality: Uplifting the voices of women and girls to unlock our world's infinite possibilities” tih hman a ni. Hmasawnna nghet a awm theihna tura gender equality pawimawhna te, hmeichhiate'n an theihna neihte an pho chhuah theihna tura thuam chak an pawimawhnate tarlan a nih rualin, mipa leh hmeichhia thliar hranna awm tihreh a, education leh healthcare tihchangtlun a ṭulna tarlan a ni bawk.

Kum 2022, November thla khan khawvela mihring cheng zat chu tld 8 a tling a, kumin April thla khan India chuan China lehpelin, khawvela mihring tamna ber ram a ni bawk a ni.

Kum 70 chhungin mihring a let 3-in pung

Kum 1955 khan khawvel pumah mihring tld 2.8 an awm a, tunah erawh chuan China leh India ram pahnihah chauh pawh hemi zat hi an awm tling tawh.

Kum 1950-a mihring tld 2.8 awm chu, kum 2022-ah tld 8-ah pungin, a let thum zetin a pung. United Nations Population Division chuan kum 2050-ah khawvel mihring awm zat hi tld 9.7 vel tling turin a chhut.

2050-ah chuan India leh China dawtah, Nigeria chu mihring tamna ram pathumna ni tura chhut a ni a, United States, Pakistan, Indonesia, Brazil, the Democratic Republic of the Congo, Ethiopia leh Bangladesh ramte'n an dawt ang.

2002 hnua nau piang tlem ber kum

Kum 2022 khan khawvel pumah nau piang mtd 134 dawn an awm a, chawhrualin ni khatah nau piang hi 3,67,000 zel awm ang an ni.

Nau piang zat hi tam viau angin lang mah se, kum 2001 hnuah nikum khan khawvel huapa nau piang an tlem ber ṭum a ni thung.

Europe leh East Asia ramah nau piang an tlem chho zel a, mihring punna a tlak hniam zel avangin an sorkarte pawhin nau piang an tam a, nute chhawmdawlna pekna tur ruahmannate pawh an siam thar hlawm a ni.

Hetih lai hian Africa-ah chuan mihring an la pung chak hle thung. Niger, Uganda, DRC, Angola, Chad, Mali leh Somalia-ahte chuan kum khata mihring punna hi 3% chung lam vek an la tling.