ASEAN Meet-ah Myanmar leh South China Sea sawiho

Association of Southeast Asian Nations (ASEAN) foreign minister meeting chu nimin khan Indonesia khawpui, Jakarta-ah neih a ni. Meeting-ah hian Myanmar tualchhung buaina leh , South China Sea chungchang chu an sawiho zingah a tel.

United Nations-in June-a report a tihchhuahah, kum 2021 February thlaa Myanmar sipaite'n civil sorkar paihthla a, thuneihna an chan hnua tualchhung buaina thlengah mi 3,400 chuang an thi tawh a, mi 22,000 dawn man an ni tawh bawk.

Myanma sipaite'n thuneihna an chan hnuah, ASEAN hian high-level meeting a neihah Myanmar sipai hotute tel hi a khap a, nimina meeting-ah pawh telh an ni lo. Mahse kumina ASEAN chair, Indonesia chuan Myanmar tualchhung buaina siam ṭhat a nih theihna atan, sipai leh eptu pawlte chu inbiakna a neihpui fo tawh thung.

ASEAN hian tun kar tawp hian East Asia Summit leh ASEAN Regional Forum a hmang dawn bawk a, US secretary of state Antony Blinken leh Russia foreign minister Sergei Lavrov-te'n an hmanpui ang.