Mount Everest bula helicopter tlaah mi 6 an thi

Nepal sorkar chuan nimin khan Mount Everest bulaah mi paruk chuanna helicopter a tla a, a chuangte hi an thi vek niin a sawi. Thi zinga panga hi Mexican an ni a, pakhat hi Nepal mi a ni.

Manang Air helicopter hian Mt. Everest tlang chhip enpuiin tourist-te hi sight seeing a neihpui a, zing dar 9:45-ah Solukhombu-a Surki aṭangin Kathmandu panin an kir a, an thlawh chhuah aṭanga rei loteah biak pawh theih loin an awm a, a hnuah helicopter hi a tla tih hriat a ni.

Helicopter hi Lamjura area-ah a tla a, chhanchhuah hna thawktute kal nghalin ruang panga an hmu tawh a, ruang pakhat an la zawng mek tih sorkar official chuan a sawi.