NATO-in Ukraine member dilna pawm hun tur la bithliah lo

NATO secretary-general Jens Stoltenberg chuan Ukraine-in NATO member a dilna chu member ramte chuan an thlawp thu a sawi rualin, member atana pawm a nih hun tur bithliah a la ni lo tih a sawi.

Stoltenberg chuan an pawl zawm tura kalphung a awm thu a sawi a, mahse, Ukraine tan hian member ni tura ngaite chu ngaihnathiam an remti a, NATO member chu a la ni ngei dawn a ni, a ti.

Mahse Ukraine president Volodymyr Zelenskyy chuan NATO-in hun an bithliah thei lo chu a sawisel a, thil tih awm lo tak a nih thu a sawi.

Ukraine hi NATO member a nih chuan Russia laka ven himna kawngah NATO hian a pui thei dawn a, a security institution-te thuam chakin, inrelbawlna kawngah pawh hma a sawn thei dawn a, hei bakah hian European Union zawmna tur kawngah pawh a pui thei dawn a ni.

Member atana Ukraine lak luh chungchanga member ramte pawh an ngaihdan a in ang vek lo. Baltics ramte chuan Ukraine hi theihtawpa thlawpin, member ni thuai turin an duh a, mahse, US leh Germany erawh an la fimkhur hle thung. US president Joe Biden chuan kar kalta khan Ukraine chuan an pawl zawm tur hian a la inpeih tawk lo tih a sawi.

Member-ah la tel lo mah se, NATO ramte hian Russia nena indo mek, Ukraine leh a sipaite puihna tur hi an lo pe reng a ni. Thawhlehni khan Ukraine sipaite puihna tur puan leh niin, member ram 11-te chuan August thla hian Denmark-ah Ukraine pilot-te chu US siam, F-16 fighter jet khalh leh enkawl dan an zirtir ang. Germany chuan Ukraine siapite puihna turin USD mtd 700 a pe leh dawn nia sawi a ni bawk.

Member ram 31 awmna, NATO summit hi Thawhṭanni leh Thawhlehni khan Lithuania khawpui, Vilnius-ah neih a ni.