China-ah tuilian vangin mi 40,000 chuang hmun himah sawn chhuak

China-a Sichuan provoince-ah tuilian vangin mi 40,000 chuang chu hmun him lamah sawn chhuah an ni tawh tih nimina state media report chuan a tarlang.

Kar eng emaw chen chu China-ah hian ruah nasa takin a sur tawh a, hei vang hian hmun tam takah tuilian leh lei tawlhte an tuar a, chenna in bakah infrastructure dangte pawh a chhe nual tawh a ni.

State broadcaster CCTV chuan Sichuan province-a Yaan khawpuiah Thawhlehni khan darkar 14 chhungin ruah 330.7mm a tam a sur a, tuilian thlenin in pawh eng emaw zat a tichhia tih a sawi.

Henan province khawpui, Zhengzhou-ah pawh ruah sur nasa avang hian four-tier warning system, red alert tihchhuah a ni bawk.

Khaw chin zirtute chuan Shanxi, Hebei, Shandong, Jiangsu, Anhui, Sichuan, Gansu province-te leh Tibet region-ah ruah leh rial a la thawk dawn niin an sawi. Heng hmun ṭhenkhatah hian darkar khat chhungin ruah hi mm 70 vel a sur dawn a, ruah bakah thli leh rialte a thawk tel dawn a ni, an ti. Official-te chuan July thla chhung chu ruah sur nasa tak thleng thei reng a nih thu an sawi.