NKorea-in long range ballistic missile kap chhuak leh

North Korea chuan nimin khan an ram khawchhak lam tuipui lam aṭangin long-range ballistic missile a kap chhuak leh niin a ṭhenawm, South Korea leh Japan official-te chuan an sawi.

South Korea Joint Chiefs of Staff chuan an ram huna zing lam dar 1 khan Pyongyang area aṭanga long-range ballistic missile ni ngeia hriat kah chhuah a nih thu a sawi. Japan coast guard leh defence ministry pawhin missile kah chhuah hi an hmuh thu sawiin, chief cabinet secretary Hirokazu Matsuno chuan minute 74 chhung vel chu km 6,000-a sangah a thlawk tih a sawi bawk.

Japan coast guard chuan missile hi Korean peninsula chhak lam tuipuiah a tla tih an sawi.

NATO summit hmanga Lithuania khawpui, Vilnius-a cham mek Japan prime minister Fumio Kishida leh South Korea president Yoon Suk-yeol-te chu nizan khan an inhmu dawn a, North Korea chungchang pawh hi an sawi dun ngei rin a ni. Ram pahnihte bakah Australia leh New Zealand telna tur summit pawh neih tum a ni tih Matsuno chuan a sawi.

North Korea hian khapsak a ni chungin tun hnaia ralthuam a en chhin fo a, kuminah a ṭum khatna atan solid-fuel inter-continental ballistic missile (ICBM) pawh a lo en chhin tawh bawk. Orbit-ah military spy satellite dah a tumna erawh a hlawhchham a, mahse, official-te chuan an bei nawn leh dawn tih an sawi. UN sanction hnuaiah NKorea hi ballistic missile technology a hman khapsak a ni a, satellite kah chhuah pawh khap tel a ni bawk.