Thailand palaiin Suu Kyi-i a hmu tih a sawi

Thailand foreign minister Don Pramudwinai chuan Myanmar ram hruaitu aṭanga paih thlak, Aung San Suu Kyi chu sipaite'n an hrenna hmunah a hmu tih a sawi. Suu Kyi hian an rama tualchhung buaina chinfel a nih theihna atana inbiakna neih a duh thu pawh a hrilh niin a tarlang.

Kum 2021, February1-a Myanmar sipaite'n civil sorkar paih thlaa, thuneihna an chan hnuah Suu Kyi leh official dangte chu hren zui an ni. Suu Kyi hi hren a nih hnuah Thailand Minister hi ram dang sorkar official zinga hmaichhana hmu thei awm chhun a la ni.

Pramudwinai chuan Suu Kyi nena an inhmuh chungchang hi Indonesia khawpui, Jakarta-a Association of Southeast Asian Nations (ASEAN) meeting neihnaah midangte a hrilh a ni. Suu Kyi hian Pathianni khan hmuin, darkar khat chuang an inkawm a, a hriselna dinhmun pawh a ṭha niin a sawi. Pramudwinai chuan Myanmar buaina chinfel a nih thuai theihna tura inbiakna buatsaih a ṭul thu Suu Kyi chuan a sawi tih a tarlang bawk.

Hetih lai hian Myanmar-a sipaite'n thuneihna an chan hnua civil sorkar aiawh tura civil hruaitute'n an din, National Unity Government (NUG)-a thupuangtu, Nay Phone Latt chuan Thailand foreign minister leh Suu Kyi hi an inhmu ngei em tih chu zawhna lian tak a nih thu leh, Myanmar mipuite pawhin an rin ngam chiah loh thu a sawi thung.

Kum 78 mi, Suu Kyi hi hren a nih hnuah sipai sorkar hian thubuai hrang hrang a siamsak a, a thubuaiahte hian thiam loh chantir vek niin, kum 33 tang tura hrem a ni. Mahse Suu Kyi-i thlawptu leh rights group hrang hrang chuan sipaite'n an puhnate hi thu dik lo leh, a hming tihchhiatsak tumna, politics khel thei lo tura hrek an tumna a ni tiin an puh thung.

Rights group Assistance Association for Political Prisoners chuan sipaiten thuneihna an chan hnua Myanmar ram hmun hrang hranga buaina chhuakah civil mi 3,750 chuang an thi tawh a, mi 24,000 vel man an ni tawh bawk tih a sawi.