Sipaite dinhmun sawiseltu Russian general ban a ni

Russian sipai general, Ivan Popov chuan an ram sipai hotu lutte hnenah Ukraine nena an indo mekah thi an tam thu leh, ralthuam an ngah tawk loh thu a sawi hnuah a post aṭangin ban a ni tih a sawi.

Major general Ivan Popov hi Ukraine chhim lam, Zaporizhzhia region-a Ukraine sipaite nena inbei mek, Russian 58th Army commander a ni. Mahse voice message-ah, an dinhmun ṭhat tawk loh chungchang hotute hnena a sawi hnuah bana ni tih a sawi lang a ni. A voice message hi Russia MP Andrei Gurulyov chuan telegram-ah a post a, mahse, eng tik huna thleng nge tih erawh sawi chian a ni lo.

Maj. Gen Popov chuan sipai hotute hnena a thil thlen zingah hian, Ukraine sipaite'n artillery hmanga an beihna chhan letna tur battery system ṭha an neih loh thu leh, military intelligence lam pawh a ṭhat tawk loh thute a tel tih a sawi. Heng thu a thlen hnuah han senior commander pahnih chuan a hna aṭanga bantir turin thuneitute an phut a, hei hi Russia defence minister Sergei Shoigu chuan a lo pawmsak a ni, a ti.

Report chuan Maj. Gen Popov banna tur thupek hi Russia armed force hotu lu ber, Gen. Valery Gerasimov chuan a tichhuak tih an tarlang. Gen. Gerasimov hian Popov chu indona hmatawnga sawm sipaite chu thlak kual ṭhin a ṭul thu leh, nunna tam tak an chan tawh tia karin, hotute chu tichiaiin blackmail a tum a ni, tiin a thupek tihchhuahah hian a sawi niin an tarlang bawk. Hemi chungchangah hian Russia defence ministry lam chuan sawi an la nei lo thung.