Politics thila mante tihlumah Myanmar sipai sorkar puh

Myanmar sipai sorkar chu politics kaihhnawih thila an man zinga tam tak tihlumah puh an ni a, heng an tihhlumte hi tlan chhuah an tumna lama thi angtein an sawi nia tarlan a ni.

Myanmar-a sipaite'n thuneihna an chan hnua an rama thil thlengte zir chiangtu, Assistance Association for Political Prisoners (AAPP)-in thuchhuah a siamah, June 27 khan sipaite hian Bago Region-a Daik-U khuaa Kyaiksakaw tan ina tang ṭhenkhat chu hmun danga sawn chhuah aṭangin an tarlang a, mahse, heng mi tang 37-te chu hi thlengin an chin hriat lohin an awm zui tih a sawi. Tang chhungte'n an chanchin an zawh pawhin, tan in hotute chuan an awmna chin an hriat loh thu an lo hrilh a ni, a ti.

AAPP chuan Daik-u khaw tan in aṭanga hruai chhuahte an chin chhui zui theih lohin an awm a, an thi nge an la dam tih pawh hriat theih a ni lo tiin, sipaite hian an mi mante chu na taka an nghaisak fo bakah, tihhlumte pawh an nei fo niin a sawi.

Sipaite'n thuneihna an chan hnuah, sipai rorelna dodaltu, pro-democracy leader leh activist pali chu nikum khan thi tura an chungthu relsakin tihhlum an ni a, ram hrang hrangte sawisel pawh an hlawh phah hle. Hemi bakah hian tang zinga eng emaw zat thi tura an chungthu relsak an awm bawk.

State of emergency pawtsei dawn

Gnen Min Augn Hlaing kaihhruai, Myanmar sipai sorkar chuan sipaite hnena thuneihna sang zawk pek chhunzawm leh, inthlanpui neih tur tihkhawtlaina turin state of emergency an puan chu pawhsei leh a tum nia sawi a ni.

Kum 2021, February 1-a civil sorkar thuneihna hnehchhuh a, sipaite'n sorkarna an chelh hnua tualchhung buaina chhuak avanga state of emergency puan chu vawi eng emaw zat pawhsei a ni tawh. Sipaite hian kumin August thla vela an ram inthlanpui buatsaih an tiam hnuah, National Defence and Security Council-in an ram boruak a la pangngai lo nia a sawi avangin, February thla khan emergency hi a lo pawtsei tawh bawk.

Kum 2008-a sipai sorkarin a lo duan, an ram danpui an hman mekah state of emergency hlih a nih aṭanga thla ruk chhungin inthlan hi buatsaih tura tih a ni. Hei vang hian inthlan buatsaih tur tihkhawtlai theihna turin, sipai sorkar hian emerngey hi pawhsei chhunzawm leh a tum nia rin a ni.

Ningani khan Gen Hlaing chuan Sagaing Region, Chin leh Karenni (Kayah) state-a sipai sorkar dodaltute lakah na zawka beihpui an thlak tur thu a sawi, sipai leh civil official-te chu sipai sorkar laka helte awmna biala mipuite himna tura nasa zawka thawk turin a chah.