Putin-a'n cluster bomb an ngah tawk thu a sawi

Russia president Vladimir Putin chuan cluster bomb chhek khawl an ngah tawk tih sawiin, Ukraine rama Russia sipaite bomb an nih chuan, an rama bomb an kawl ṭhatte chu an hmelmate laka hmang turin dikna an nei tih a sawi nghal bawk.

Nimin khan state TV-ah President Putin an kawmna hi tihchhuah a ni. Putin chuan cluster bomb hman chu 'crime' anga a ngaih thu sawiin, Russia hian tun hma lam pawhin ralthuam indaih lohna a lo neih pawhin hman ṭul an ti ngai lo tih a sawi a ni.

Cluster bomb hi ram 100 chuangah khap a ni a, hetih lai hian Russia-in Ukraine a run hnuah, Ukraine chuan US aṭangin cluster bomb hi eng emaw zat a dawng tawh nia sawi a ni. Mahse Ukraine sorkar chuan hmelma sipaite beih letnaa ralthuam an indaih loh tawpah hman tur a ni dawn tih a sawi.

Hetih lai hian Human Rights Watch chuan indona thleng mekah, Russia leh Ukraine hian cluster munition hi an hmang ve ve niin a puh thung.

Ukraine leh Russia hi kar liam taa Ukriane chhim lam, Zaporizhia beih a nih chungchangah an inpuh tawn mek. Russia hian nikum khan Zaporizhzhia lak a tum a, mahse, a bial pumpui erawh a la thei lo a, region capital Zaporizhzhia khua hi Ukraine thununna hnuaiah a la awm a ni.

Ukraine President Office chuan Russia-in Zaporizhzhia biala thingtlang khua a beihnaah civil mi pathum an hliam niin a sawi a, mahse, Russia official-te chuan Ukraine sipaite hian school pakhat an kap chhia niin an sawi ve thung.

Russia defence ministry chuan Zaporizhzhia biala Ukraine ralthuam chhek khawl eng emaw zat chu Inrinnni khan a tihchhiatsak niin a sawi bawk.