PTI hnawl a nih chuan political party thar ka din ang : Imran Khan

Pakistan prime minister hlui, Imran Khan chuan an ram inthlanpui neih tura a party, Pakistan Tehreek-e-Insaf (PTI) chu tel ve thei lo tura khap a nih chuan political party thar a din tur thu leh, hnehna pawh an chan ngei a rin thu a sawi.

May 9-a Imran Khan man a nih avanga PTI member-te'n an ram chhung hmun hrang hranga buaina an chawh chhuak hnuah, sorkar lam mi pawimawhte chuan PTI hi dan pawna hnawl tura an duh thu an sawi fo tawh a ni.

Pakistan interior minister Rana Sanaullah chuan, an rama politics buaina thleng mek chinfelna chu PTI dan pawna hnawl a ni tiin, defence minister Khawaja Asif pawhin hemi chungchang hi ngaihtuah mek a nih thu a sawi bawk.

Pakistan Peoples Party (PPP) chairman leh foreign minister, Bilawal Bhutto Zardari chuan PTI hi dan pawna hnawl a nih pawhin an party chuan an dodal dawn lo tih a sawi.

Imran Khan chuan, "Kan party hi an ṭhiat emaw a nih pawhin, party thar dinin, hming thar nen inthlanah hnehna kan chang leh dawn tho a ni," a ti a, amah chu disqualify-in man pawh ni se, an party inthlanah a chak dawn tho niin a sawi.