SKorea-ah ruah sur nasa avanga chhiatna thlengah mi 40 thi tling tawh

South Korea-ah ruah sur nasa takin tuilian leh leimin a thlen avanga thi chu nimin thleng khan mi 40 an tling tawh.

President Yoon Suk-yeol chuan Ukraine aṭanga a kir hnuah, nimin khan an rama chhiatna thleng chungchangah emergency meeting a ko nghal a, thuneitu hrang hrangte chu chhiatna tawkte chhanchhuah leh chhawmdawl hna rang taka kalpui zel turin a chah. President chuan ruah sur avanga chhiatna thlenga nunna chan an awm chu pawi a ti takzet a, an chhungte a tawrhpui thu a sawi.

President hian nimin khan chhiatna thlenna hmun ṭhenkhat pawh a tlawh nghal a, chhiatna thleng chungchangah thuneitute chu disaster response rules zawm ṭha tawk lohah a puh.

South Korea-ah hian July 9 aṭang khan ruah nasa takin a sur a, ram chhung hmun laili leh chhim lam bialahte tuilian leh leimin nasa tak a thleng a ni.

Cheonju-ah chuan lui lianin motor 16 vel a hnawl a, heng zingah hian bus pawh a tel. Chhanchhuah hna thawktute'n Pathianni zan khan heng motor-a chuang zinga ruang pali chu tunnel-ah an hmuh belh leh. Inrinni khan ruang pakua an lo la chhuak tawh bawk a ni. He tunnel-ah hian chhanchhuah hna thawk turin sorkar chuan rescue worker 900 dawn a dah.

Korea Meteorological Administration chuan ruah nasa tak a la sur chhunzawm dawn tih nimin khan an sawi a, zanin thlengin central leh southern province lamah ruah hi mm 100-200 vel a la sur dawn niin a chhut.

Ministry of interior and safety chuan ni eng emaw zat ruah nasa taka sur chuan chenna in 200 dawn bakah, kawngpui 150 vel a tichhe tawh a, mi 28,607 chu power supply nei loin an awm mek tih a sawi. July 9 aṭang khan mi 10,000 chuang chu hmun him lamah sawn chhuah an ni tawh bawk a ni.